07.02.2019
Cora jo se w radnicy města wótměło źěłowe rozgrono mjazy wótpósłańcami Serbskego sejma, parlamenta Serbow, a wušym šołtu města Chóśebuza, Holgerom Kelchom. We njom jo se póstajiło, až buźo město Chóśebuz gósćowaŕ za jadno z pśiducych plenarnych pósejźenjow Serbskego sejma. Wušej togo jo se pógnuło, pśewjasć wósebne pósejźenje togo za serbske nastupnosći zagronitego wuběrka Zgromaźiny měsćańskich wótpósłańcow Chóśebuza ze zastupnikami Serbskego sejma.
W tom zmysle jo se wobjadnało móžne zgromadne źěło fachowych wuběrkow Zgromaźiny měsćańskich wótpósłańcow a Serbskego sejma. Dalej jo se póstajiło, až zastupniki Serbskego sejma se pśepšosuju na lětnje pśewjeźone źěłowe rozgrono wušego šołty ze zastupnikami serbskich gremijow a institucijow.
Holger Kelch: „Smy w Chóśebuzu, centrumje Serbow Dolneje Łužyce, wólbu do Serbskego sejma ze zajmom k wědobnju wzeli, pśeto witamy kuždu kšoceń, kótaraž wóznamjenijo zmócnjenje demokratije na městnje. Jo mója winowatosć, wšykno pódeprěś, což spěchujo zajmy serbskich bergarkow a bergarjow našogo města a zmócnijo serbski głos za našu zgromadnu łužysku domownju. W corajšnem rozgronje smy zgromadnje wobjadnali struktury a wopśimjeśa zgromadnego źěła, z kótarymiž mógu se toś te zgromadne zaměry konsekwentnje dojśpiś.“
Rownocasnje wušy šołta Holger Kelch wujasnijo, až dotychměst wuprobowane zgromadne źěło z Domowinu a drugimi serbskimi zjadnośeństwami a institucijami se zboka města pókšacujo.
Z wólbu Serbskego sejma su sebje Serby wutwórili nowy politiski rěd. Rozdźělenje nadawkow w nutśikach serbskich strukturow pak wóstanjo nadawk Serbow samych. Město Chóśebuz wužywa wšykne potenciale, kótarež zmócnjaju perspektiwy Łužyce a jeje wósebnu swójnosć, serbsku rěc a kulturu. To pśitrjefijo teke za strukturnu změnu. Gaž wótpósłańce Serbskego sejma zaměr swójeje politiki wopisuju z wobrotom „źiśiźiśam gódne“, ga jo to tež za Chóśebuz późiwabny pśistup