Głowna zgromaźina župy Dolna Łužyca

Na głownej zgromaźinje župy Dolna Łužyca z.t., dnja 27. januara jo se wobźěliło 59 delegatow Domowinskich kupkow a towaristwow ako teke gósći w bogatej licbje. Pśeto až Domowina - Zwězk Łužyskich Serbow z.t. wóswěśijo lětosa swójo 100. wobstaśe, jo se pokazało na wšake wjeraški serbskego žywjenja w Dolnej Łužycy.

Tak buźo dnja 20. apryla w Statnem źiwadle Chóśebuza pśedstajenje oratorija „Nałěśe”. Město Chóśebuz buźo swój „Serbski swěźeń” dnja 23. junija w ramiku Chóśebuskego měsćańskego swěźenja pód nadpismom „100 lět Domowina“ swěśiś. Zasej buźo how rbb-studijo Chóśebuz ze swójim serbskim programom medijowy partnaŕ. Dnja 6. julija se wótmějo w Serbskem muzeju Chóśebuza wótwórjenje wustajeńce k stawiznam Domowiny a k Dnju Bramborskeje 01. a 02. septembra wugótujo Domowina zgromadnje z Błośańskim towaristwom na jawisću pśed grodom w Lubnjowje program serbskeje kultury.

"Mój pśichod lažy we Łužycy" se groni akciji, kenž jo Dawid Statnik, pśedsedaŕ Domowiny - Zwězka Łužyskich Serbow z.t., na głownej zgromaźinje župy Dolneje Łužyce pśedstajił. 100. narodny źeń Domowiny jo dobra góźba, teke na serbski dorost mysliś. Tak by kśěła Domowina kuždemu góleśeju swójich cłonkow, kótarež jo se w casu až do decembra 2012 naroźiło, rada wósebny pulowerik dariś. Naśišć "Mój pśichod lažy we Łužycy" ma zwurazniś zgromadne žycenje za dorost.

K župje Dolna Łužyca z.t. słuša něnto 37 kupkow a 19 towaristwow z dogromadu 1.923 cłonkami. Dolnołužycanarje wucyniju z tym pó licbje nejmócnjejšu župu. Wóna jo se wutwóriła z něgajšnych župow Chóśebuz, Gubin/Baršć, Kalawa/Lubin a Grodk. Župa jo se załožyła dnja 31. maja 1991. Ako jadnučka ze źinsajšnych pěś župow Domowiny agěrujo wóna ako samostatne zapisane towaristwo.
W Chóśebuzu jo pěś młoźinskich kupkow Domowiny w měsćańskich źělach Depsk, Zaspy, Žylow, Škódow a Rogozno aktiwnych. Mimo togo źěłaju dalšne kupki w młoźinskem aktiwje Domowiny sobu, kenž pśigótuju a pśewjeduju serbske nałogi ako na pśikład zapust a kokot.

weitere Informationen